அன்பெனப் படுவது யாதென அறிந்திட இன்புற வள்ளும் இயம்பன கேட்பீர்!

அன்பெனப் படுவது யாதென அறிந்திட
இன்புற வள்ளும் இயம்பன கேட்பீர்
அன்பிற் கில்லை அடைக்கும் தாளே
என்பும் தருவர்! சொல்லார் தமதென!
உடலும் உயிர்போல் அன்பும் வாழ்வும்
ஆர்வம் தந்தும் நட்பினைப் பெற்றும்
அறமோ மறமோ அதுவே துணையே
அன்பில் வாழ்வு பட்ட மரமே
அகத்தின் இயல்பே அன்பெனப் படுமே
அன்பின் வழியே உயிர்கள் இயங்க
இன்றெனில் உடம்பு எலும்பொடு போர்த்திய
ஒன்றென ஓதினார் வள்ளுவப் பெருந்தகை
நன்றென நானும் பாடலை முடித்தேன்!

புலவர் சா இராமாநுசம

உறவே இன்றே உரைப்பது ஒன்றே அறிவெனப் படுவது யாதென அறிந்தே

உறவே இன்றே உரைப்பது ஒன்றே
அறிவெனப் படுவது யாதென அறிந்தே
ஓதிய வள்ளுவன் கருத்தினைத் தெரிந்தே
ஒருசில இங்கே உரைத்திட லானேன்
அழிவினை நீக்கி பகைவரைத் தடுத்தும்
மனதினை அடக்கி எப்பொருள் ஆயினும்
எவரதைச் சொல்லினும் உண்மை உணர்ந்தும்
சான்றோர் நட்பொடு உலகுடன் ஒத்தும்
பின்வரல் உணரந்து அஞ்சுவ அஞ்சியே
நடப்பதே அறிவென நவின்றார் வளுவர்

புலவர் சா இராமாநுசம

அழகெனப் படுவது யாதெனில் உறவே!

அழகெனப் படுவது யாதெனில் உறவே
அகத்தின் அழகே அழியா என்றும்
செகத்தில் நம்மிடம் செப்பிட இன்றும்
இருப்பது தாமே! அறிவோம் நாமே
புறத்தில் தோன்றுவ காலப் போக்கில்
மாறியே வருமே முதுமையைத் தருமே
அகத்தின் அழகே அழியா என்றும்
இகத்தில் நமதுயிர் ஏகும் வரையில்

புலவர் சா இராமாநுசம்

இனியது கேட்பின் எனதரும் உறவே இனிது இனிது இல்லற வாழ்வே

இனியது கேட்பின் எனதரும் உறவே
இனிது இனிது இல்லற வாழ்வே
ஈட்டிய பொருளும் இணையில் மனைவியும்
வீட்டுடன் வசதியாய் அமைந்திடு மானால்
இனிது இனிது இல்லற வாழ்வ
இல்லற இல்லது நல்லறம் இல்லை
இணையில் வள்ளுவர் இயம்பிய வழியில்
மக்கள் செல்வம் ஆணென பெண்ணென
இரண்லடே போதும் இனிதென ஓதும்
இப்பெரு உலகில் இனியதே யாதும்
ஓப்பிலா என்றே செப்பிடல் ஒன்றே
இனிது இனிது இல்லற வாழ்வே!\\

புலவர் சா இராமாநுசம்

பெரியது கேட்பின் எனதரும் உறவே!

பெரியது கேட்பின் எனதரும் உறவே
பெரிது பெரிது பெரியோர் துணையே
அதனினும் பெரிது அவர்வழி நடத்தல்
அறம்வழி வாழ்ந்து மறம்தனை தவிர்த்தல்
அதனினும் பெரிதென அறிவது நன்றே
பெண்மையைப் போற்றி உண்மையே சாற்றி
பூண்பதே இன்பம் போய்விடத் துன்பம்
காண்பதே பெரிதெனக் கவிதையை முடித்தேன்

புலவர் சா இராமாநுசம்

அரியது கேட்பின் எனதரும் உறவே

அரியது கேட்பின் எனதரும் உறவே
அரிது அரிது இன்றைய உலகில்
வாழ்தல் தானே மிகமிக அரிது
அதைவிட அரிது நேர்மைவாழ்வே
சூழ்நிலை அவனை விடுவதோ அரிது
அதைவிட அரிது சுயநலம் மறத்தல்
இவ்வண் வாழ்தல் எவ்வண் ஆகும்
இருப்பதே போதுமாய் எண்ணலோ அரிது
இன்னும் பலவே எழுதினேன்  சிலவே

புலவர் சா இராமாநுசம்