பிழையன்றோ ? ஆள்வோரே எண்ணி பாரீர்- ஏழைப் பேதையராம் அன்னவரை காக்க வாரீர்!

ஏதேதோ  நடக்குது  நாட்டுனிலே –முழுதும்

   எழுதிட  முடியுமா  பாட்டினிலே-நடக்கும்

தீதேதோ  தெரியாது  வாழுகின்றோம்-போகும்

   திசைகாணா துயர்தன்னில்  வீழுகின்றோம்-மேலும்

போதாது விலைவாசி  விண்ணைமுட்ட –தினம்

   புலம்பிட  மக்களும்  கண்கள்சொட்ட! –அதனை

ஒதாது இருந்திட  இயலவில்லை-ஏதோ

   உள்ளத்தை  வருத்திட வந்ததொல்லை

பகல்கொள்ளை  படுகொலை  பெருகிப் போச்சே-நாளும்

    பயத்துடன்  வாழ்கின்ற  நிலையு மாச்சே!-வேறு,

புகலென்ன ! வழியின்றி!  வருந்த லாச்சே-நாடும்

     போவதென்ன  காடாக!  மாற லாச்சே!-மேலும்

மழைவெள்ளம்! இட்டபயிர் அழிந்து போக-கண்டே

    மனம்குமுறும்  விவசாயி நொந்து சாக!-நீதியில்,

பிழையன்றோ ? ஆள்வோரே  எண்ணி பாரீர்- ஏழைப்

    பேதையராம் அன்னவரை காக்க  வாரீர்!

புலவர்  சா  இராமாநுசம்