முல்லைப் பெரியார் அணைமட்டும்-அந்த முரடர்கள் செயலால் முடங்கட்டும்!

எழுவாய்த்  தமிழா  எழுவாயா-அணையை
     இழந்த   பின்னர்  அழுவாயா!
வழுவாய்ச்  சொல்லியே  துடிக்கின்றார்-நீர்
     வழங்கிட  பொய்பல  தொடுக்கின்றார்!
தொழுவாய்  எதற்கு  வடநாடே-அவர்
    துணையால்  நடப்பதே  இக்கேடே!
கழுவாய்  எதிர்ப்புப்  போராட்டம்- இங்கே
     கண்டவர்  புத்தி  மாறட்டும்

முல்லைப்  பெரியார்  அணைமட்டும்-அந்த
     முரடர்கள்   செயலால்  முடங்கட்டும்!
எல்லைப்  போரே  நடந்திடுமே-நம்
    ஏக  இந்தியா  உடைந்திடுமே
தொல்லை மத்தியில்  எவர்வரினும்-உடன்
     தொடுப்போம் அறப்போர்  துயர்தரினும்
இல்லை  என்றால்  பெருந்தீங்கே –இங்கு,
     ஏற்படும்!  தீர்ப்பால்!  பயனெங்கே

திட்டம்  இட்டே   செய்கின்றார்-அவர்
    தினமும்  பொய்மழை   பெய்கின்றார்
கொட்டம்  இனிமேல்  செல்லாதே-தமிழன்
    குமுறும்  எரிமலை!  பொல்லாதே!
சட்டம்  நமக்கே சாதகமாய்- தீர்ப்பு
     சரியென  வந்தும்  பாதகமாய்
பட்டே  அறிவும் வரவில்லை!   -இதுவே
     பண்பா ?  பகையா!? தெரியவில்லை!

அனைவரும்  ஒன்றாய்  சேருகின்றார்-நம்
     அணையை  உடைக்கக்  கோறுகின்றார்
இனியென  தமிழகம்  திரளட்டும்-நம்
      எழுச்சியை  உலகம்  உணரட்டும்
தனியொரு  புதுயுகம்  தோன்றட்டும்-பின்
      தக்கதோர்  பாடம்  கற்கட்டும்
மனித நேயமே அற்றவர்கள்-பாபம்
      மனதில்  நோயே  உற்றவர்கள்

உதிரிப்  பூவாய்  கட்சிகளே-இங்கே
    உள்ளது  சரியா  கட்சிகளே
எதிரிகள்  அனைவரும்  ஒன்றாக-அங்கே
    இருப்பதைக்  காண்பீர்  நன்றாக
சதிபல  அன்னவர்  செய்கின்றார்-ஏற்ற
    சமயம்  இதுவென  முயல்கின்றார்
மதிமிகு  தமிழா  எழுவாயா –நம்
    மானத்தை  உரிமையைக்  காப்பாயா

                         புலவர் சா இராமாநுசம்