மறந்தால் அனைத்தும் நஞ்சாகும்!

உண்ணும் உணவும் நஞ்சாகும்-நாம்

     உட்கொள்ளும் மருந்தும் நஞ்சாகும்

எண்ணும் எண்ணமும் நஞ்சாகும்-நம்

     எழுதும் எழுத்தும் நஞ்சாகும்

கண்ணும் பார்வையால் நஞ்சாகும்-சில

     கருத்துகள் கூட நஞ்சாகும்

பண்ணும் பாடலில் நஞ்சாகும்-இறை

    படைப்பில் சிலவும் நஞ்சாகும்

காற்றும் இன்றே  நஞ்சாகும்-அலை

    கடல்தரும் உணவும் நஞ்சாகும்

தூற்றும் குணமே நஞ்சாகும்-உற்ற

    துணையே சிலருக்கு நஞ்சாகும்

போற்றும் போலிகள் நஞ்சாகும்-சேர்த்த

    பொருளும் சிலருக்கு நஞ்சாகும்

ஆற்றல் மிகுதியும் நஞ்சாகும்-ஏதும்

    அறியா நிலையும் நஞ்சாகும்

உற்றார் சிலரும்  நஞ்சாகும்-பெற்ற

      உரிமையும் கூட நஞ்சாகும்

பெற்றவர் பிள்ளைக்கே  நஞ்சாகும்-சில

      பிள்ளைகள் அதுபோல் நஞ்சாகும்

கற்றநல் கல்வியே நஞ்சாகும்-அதை

      கல்லார் வாழ்வும் நஞ்சாகும்

மற்றவை பலவே நஞ்சாகும்-இதை

     மறந்தால் அனைத்தும் நஞ்சாகும்

            புலவர் சா இராமாநுசம்