இந்திய நாட்டை ஆள்வோரே

 இந்திய  நாட்டை  ஆள்வோரே-ஏக
     இந்திய என்றே  மகிழ்வோரே
தந்தேன்  கடிதம்  என்றிங்கே-எம்
    தமிழக அரசு சொலவ‍ங்கே
வந்தேன்  கண்டேன்  எனநன்றே-தம்
    வருகையை  மத்திய  அரசின்றே
செந்தமிழ்  நாட்டில்  உள்ளோரே-செய்தி
    செப்பிட  மனதில்  கொள்வீரே

அஞ்சிய  மக்கள் போராட்டம்-மகளிர்
    அளவிட இயலா பெருங்கூட்டம்
நஞ்சென  அறிந்தும் உண்பாரா-தம்
    நல்லுயிர்  போகக்  காண்பாரா
நெஞ்சில்  ஈரம்  இல்லோரே-உள்ள
     நிலைமைப்  புரிந்து  கொள்ளாரே
பஞ்சில்  பட்ட  நெருப்பாகும்-அவை
     பற்றினால்  ஆள்வோர்  பொறுப்பாகும்

வெந்தப்  புண்ணில்  வேல்கொண்டே-குத்தி
     விடுவது  போலும் செயல்கண்டே
நொந்து  நூலாய்க்  கிடக்கின்றார்-உண்ணா
     நோன்பும் உறுதியாய்  இருக்கின்றார்
வந்துப்  போனால் ஆகாதே-வாய்
      வார்த்தையும்  நம்பிட ஆகாதே
எந்தப்  புற்றில்  பாம்பென்றே-மக்கள்
    எண்ணிட  இயலா  நிலையின்றே  

       புலவர் சா இராமாநுசம்