என் காதல் கவிதையும் நீயும்..

ஏடெடத்தேன் கவிஎழுத ஓடிவந்தாய்-அடி
என்னவளே எதற்காக ஊடிநின்றாய்
பாடிநான் முடிப்பதற்குள் வாடிப்போனாய்-என்
பாவுக்கு நீதானே பொருளா யானாய்
தேடியதைபோகாமல் சொற்கள் தாமே-என்னை
தேடியிங்கே வந்துவிட உடனேநாமே
கூடிமகிழ வருவாயா பெண்ணே-இன்பம்
கொள்ளையோ கொள்ளை கவிதைபெண்ணே

இனிமேலும் வேண்டாமே சண்டித்தனமே-நான்
என்றேனும் கோபித்த துண்டாதினமே
நனிமேலும் ஊடியே செல்லவேண்டாம்-அது
நன்மையா அல்லவே எண்ணிலீண்டாம்
கனிமேலும் கனிந்தாலே கெட்டேபோகும்-இது
கதையல்ல தொடர்பின்றி விலகலாகும்
பனிப்போரை நீக்கிவிட நீயும்பெண்ணே-உடன்
பறந்திங்கே வந்திடுவாய் கவிதைப்பெண்ணே

அதிகாலை உன்முகத்தை பார்த்துவிட்டே-என்
அடுத்தபணி அறிவாயா நெஞ்சைத்தொட்டே
புதுமாலை போன்றவளே புரிந்துமேனோ-நீ
புரியாத போல்நடித்தல் நியாம்தானோ
மதுமாலை வருமுன்னர் வருவாய்வீணே-நீ
வருகின்ற வழிபார்த்தே யிருப்பேனானே
இதுகாறும் கூறியதைக்கேட்ட பெண்ணே-உடன்
இனிதாக வந்திடுவாய் கவிதைபெண்ணே

புலவர் சா இராமாநுசம்